image
image
image


Kairoir Ehute Radio Program

 


 

KAIROIHR EHUTE RADIO PROGRAM NO. 18-16

          Iheng, mwohn aht pahn patohieng nan sapwelimatail program en “ Kairoihr Ehute” Pohnpei Radio Program Nempe #18-16, oh pwehki program wet ah pahn pato nan Radio Station V6AH , aht tungoal keipwenih pahn kupwuren Kahlapoko /Erekisoko enPohpei Uh. Wahulap pahn kupwuren Iso Nahnkenko, wauhneki Likendko/ Nahnalengko, Nahnkenieiko.

 

Aht tungoal wahu tohrohr ong Kepina en Pohnpei, The Honorable Marcelo Peterson, Kepina Keriauh, Honorable Reed Oliver, Speaker en Legislature, The Honorable Fernando Scaliem, oh iengemwi Soun Kauada Kosonned kan, Soun Kopwung Lapalap en Mwolen Kopwung Ileile en Pohnpei, The Honorable Banjamin Rodriguez, oh iengemwi Soun Kopwung kan, keidi teikan nan dakehn koperment  siluh, nan pali en tiahk, mwomwohdiso kan, oh tohn Pohnpei unsek, sang Pingelap lel Kapingamarangi.

       

  “Kairoihr Ehute,” iei Sapwelimen Pohnnpei Radio Program ehu me wiawihda pwehn sekerehki tohn Pohnpei ire oralap kesemwpwal kan me wiewiawi de mwekimwekid nan Ohpis en Kepina.

Ire Oralap Kan en Program No. 18-16:

 

a..Kepina Tuhwong Committee en Silimen en Legislature.

 

b. Seminar Mithting en Fisheries Pohnpei.

 

c. Kesepwul en COM-FSM

 

d. Rahn en Lih en Wein U

 

e. JCM Mid-Year Review

 

f. Kepina Idihada Ekei ah Tungol Cabinet oh Kadar Ohng Legislature.

 

Ire Keieu: Kepina Keieu, The Honorable Marcelo Peterson kasamwoh  Committee en Silimen en Legislature.

Committee en Silimen me Speaker pilada ren tuhong Kepina Keieu, The Honorable Marcelo Marcelo Peterson pwe irail en kapehseieng Kepina me Legislatuer Keduwapak 9TH  tialahnger nan ah Mihting Koasondi Keriapak oh onopadahr pahki oahng tohn Pohnpei pwukohn kawada kosonned.

Towen committee en silimen wet iei Vice Speaker  Soaram, me wia Chairman oh me towe iei Senator Edmund oh Senator Liwi. Chairman Soram kasalehda me Committee en Silimen idando en Legislature tungol rahn mwahu oh kaping pwehki ehupeneh kan me kahredahr pweidahn doadohk, oh peki sawas minimin me mie ansou wet en doudoulahte nan pwungen rahn kauada kosonned oh rahn kakehlaka. Senator Soram pil kasalehda ma mie anahn sang ni Ohpis en Kepina ah en pil kak sansal pwehn wia en Committee kepinwar ieng nan legislature.

Kepina wia ah tungol sekeren wahu ohng Committee en Silimen oh doaula wia ah kaping ohng legislature pwehki ah kin mwadangete apwalih anahn en rahn kakehlaka kosonned kan oh peki wiepen doadohk mwahu oh mwadang me mie rahn wet nan legislature en doudoulahte mwowe. Kepina Peterson pil patowan ohng Committee me miniminpenehn doadohk kin elehda pweida nan ansou karos.                       

Kepina patowen kasalehda me mie ireh kei me emen legislature en sawas iang apwalih karwaru, iei me iangahki:

v  Komwomwadahn kosonnned en koasoansapahlih Ohpis en Kepina, oh

oh ah tungol idihdah kan me saihk epwelda nan legislatuer.

 

v  Soandihn Project Management Ohpis PMO pwe doadohk en mwekidla mwowe, mehlel me pid budget en Ohpis kapw wet.

 

v  Epweldahn ma mie pekpek sang rahn kakehlaka kosonned me doke sawas ohng Micronesian Track and Field Championship Game.

 

v  Pekipek kan sang Executive Branch me doke Mihting Lap en Pacific Islands Forum, me towe mihmi ni aramas 500.

Kepina kasalehieng Committee en Silimen me Company me adaneki Lion pwehki ah tungoleniki semen pahn pwukohki kosonehdi ohpis kapw en PMO, iangahki kosone soangen tohn doadohk me pahn anahn nan soangen ohpis kesemwpwal wet, oh audehda.

Pwehki en Kepina tungol idihda ohng Kempa en Roson Mwahu oh Kamaraihn ara sohte alehdi kamanaman, weliepera pahn kapdolong iangahki idihda kan me saihk oang legislature wihk wet, Kepina kosoia.

Ire keriauh: FSM Seminar en Fisheries pahn Wiawi nan Pohnpei State.

Government en Pohnpei State pahn iang towehda Fisheries Seminar me koasoandier en tepda Niesil, May 18, 2016, nan wasahn mihting en Tuna Commission nan Kolonia. Me pahn towe de iang Seminar wet sang Pohnpei iei me iangahki:

1.    Mr. Casiano Shoniber, Administrator en Ohpis en Fisheries and Aquaculture, oh ih me pahn welian Ohpis en Kepina.

2.    Ms Christina Elnei, pahn welian pali en investment.

3.    Mr. Adelino Lorense, Administrator en Office en Economic Affairs.

4.    Mr. Clay Hedson, Representing Ohpis en Fisheries and Aquaculture.

5.    Mr. Saimon Mix and Mr. Larry Adams pahn welian palien pesines kan.

6.    Mr. Eugene Joseph, pahn welian Non Government Organizations NGOs me iang Koperment pwukohki nahk wahn sehd oh sahpw.

7.    Ms Michaela Saimon, staff en Ohpis en Economic Affairs.

8.    Mr. Heinrick Stevenson, Public Relations

Kahrepen mihting wet nin duwen ah sansal sang National Government pwehn kapehseieng lapalap akan nan Koperment Lap en FSM oh State pahieu, wiepeh ieu me ekei pali de wehi kan me sainla Nauru Agreement me FSM iang saihn, doadohngkier ohng nahk mwahmw tuna, pwehn dehr mwomwla, ahpw ansouohte kapaih me kin lohdi sang tuna ohng ehu ehu wehi pwukat kin laudla. Nan Seminar de mihting wet kaweweh kan pahn wiawi me pahn pid FSM ah pahn kak doadohngki wiepe wet pwehn kapikada elen doadohk tohto oh kalaudehla mwonihn Wehi de Koperment pwehki doadohk oh tax kan.

 

 

Ire Kesiluh: Kesepwil en COM-FSM

Ni May 11,2016 Kepina en Pohnpei oh Keriau en Kepina aledier kisin likou en luk sang Board of regents, administrators, faculty, staff, oh serihn skuhl en College of Micronesia-FSM, irahn iang towehda rahn en kesempwal ong irail serih kan me kosondier ren iang kesepwil.

Kepina en Pohnpei oh Keriau en Kepina iangehr towehda kesempwal wet ohng irail kan me pweidahr oh nekisangehr College en Micronesia-FSM.

Ire Kapahieu:  Rahn en Lih ong Weisohn U

Nialem,  May, 6 2016, Kepina en Pohnpei iangehr towehda rahn kesempwal ohng Wein U, iei Rahn en Lih en Weisohn U kan, me tepda Kulok 10 Nimenseng.

Ire Kelimauh:  JCM Mid-Year Review

Kepina en Pohnpei aledier kisin likou en kapehse sang Department de Kempa en Foreign Affairs ohng kosondi en meeting lap, Joint Committee Meeting me pahn wiawi ni May 18,2016, nan Department en Foreign Affairs perehn mihting, tepida Kulok 9:00 a.m. lel 5:00 Nisoutik . Kosondi en meeting wet sang US Embassy pwe petehk sapahl ong ireh kan me anahn en epwelda nan meeting me wiawiher Pohnpei nan Pahr 2015.

Kepina en Pohnpei idiadahr Keriau en Kepina en welian ohng nan mihting tohrohr me kosondier pahn wiawi ni May 16, 2016 ni office en Environment and Emergency Management perehn mihting ong kaunopdahn Joint Committee Meeting me kosondi pahn wiawi ni May, 18, 2016.

Ire Keweneuh. Kepina Idihada Ekei tohn ah Tugoal Cabinet oh Kadar Ohng Legislature.

Nialem, May 13, 2016, Kepina, The Honorable Marcelo Peterson kadar ohnger Legislatue Keduwapak irail idihda pwukat:

Mr. Emilio Eperiam, en moange Ohpis en Usuhs.

Mr. Pelciano Perman, en moange Ohpis en T&I

Ms Christian Elnei, en moange Kempa en Mwohni oh Epwelpen Tohn Doadohk oh Dipwsouhn Koperment.

Mr. Dionisio Saimon, en moange Kempa en Roson Mwahu.

 

Met kaihmwsakala Kairoihr Ehute, Pohnpei Radio Program No. 18-16.

 

Kupwur ehu de mehmen me mie sapwelime iren kalelepak me pid ire pisetik en ire oralap kan me sansalehr, komw kak mahsendo ni Ohpis en Public Affairs ni telephone number 320-2570 de Ohpis kan me apwahpwalih ehu ehu ire oralap kan me sansalehr nan radio program wet.

Kalahngan oh Kaselehlie Maihngko

 

 

 

RONGEN POHNPEI

 

(Sang Ohpis en Kepina, Kolonia, Pohnpei, Federated States of Micronesia)

 

 

IRE KEIEU, En Kepina ah Tungol Ruwes en Apwalih El Nino, de Kahpwal en Karakar Laud.

 

          PWEHKI, tepdahr nan souhnpwong en October, 2015, eh sansalehr me kahpwal en El Nino de karakar miehier nan Pohnpei, oh

 

          PWEHKI, en Wein America wasahn ireirong karakar me pil pwukohki ekei wehi de dekehn Pacific kan, kasaledahr me Pohnpei miher nan karakar laud nan souhnpwong en February, 2016; oh

 

          PWEHKI, poahson sang nan mehn irong karakar en sahpw sang January lel February 16, 2016, wein Pohnpei mwekid sang ni sohte karakar kolahng ni karakar (January 5, 2016) ohng karakar laud (February 16, 2016), me kasalehda me karakar wie kokolahte mwowe ohng Pohnpei; oh

 

          PWEHKI, PUC repwohtkier me wasah kei nan Pohnpei tepier kehn epwelen pihl; oh

 

          PWEHKI, popouhswehn kahpwal en karakar pahn ni soh peikasal pahn uhdahn saihr en aramas mouhr oh audepen mour me pato nan sahpw akan; oh

 

          PWEHKI, nin duwen keseupen kahpwal en karakar soh kesikpe wet, eh konoahng mehlel kitail en apwalih doadohk kan me pahn sewesei kitail kolokol roson mwahu oh onepek oh meleilei ohng aramas oh tehtehn sahpw akan; oh

 

          PWEHKI, kapehse wiawihengehr Wein Pohnpei me President en Wein Kahndeke Kapatapat en Micronesia kalohkier me Wehi de State kan en FSM patohier nan kahpwal en El Nino; oh

 

          PWEHKI, eh kesemwpwal mehlel Wein Pohnpei en ehu ieng Koperement en FSM ohng ireh kan me pid El Nino nin duwen ah kapwaredahr iren kahpwal kan ohng mour en aramas oh dipwsoau kan; oh

 

          ANSOAUET IHME KAREHDA, nin duwen manaman me ih tungoaleniki pahn kehkehlik en Iretikitik 1-102(c) en Kosonned en Pohnpei Nempe 8L-20-13, ngehi Marcelo Peterson, Kepina en Wein Pohnpei, ruwesedahr doadohk kan me pahn apwalih kahpwal en karakar laud en wiawi. Ei tungoal Emergency Task Force kapwukohiengehr en idawehn oh apwalihada ire pwukat ni ansou mwadang: Ehuieng ohpis kan en Koperment en FSM oh Koperment en nan Wehi kan, tehkada kahpwal en El Nino nan pesines oh ohpis kan, pil iangahki wasah kan nan Pohnpei me kahpwal en El Nino de karakar laud wet pwaradahr ie. Kapedolong repwoht en kedierekdah kan me mie nan rahn akan iangahki kaweihd dahme Kepina oh Speaker en 9TH Legislature en wia, koaieuhn repwoht en dehr pwandasang nan rahn 15 sang rahn wet, Februaray 18TH en Pahr 2016. Saihn Marcelo Peterson, Kepina en Pohnpei.

 

IRE KERIAUH: Kasarawi en Ritidahn Pohnpei Fitness Center

          Ni February 11, 2016, Kepina iang towehda kasarawi en ritdahn Pohnpei Fitness Center ( washan pakir oh exercise) me kamwahulahr oh pwurehngehr ritda ong kamwadong en boxing oh pil exercise teikan kakehr wiewiawi loale. Australian Embassy, ehu iengehr Pohnpei State Government oh pwurehng kamwahuila Pohnpei Fitness Center wet me kasarawi en ritdahn ihmw wet wiawiher. Kepina en Pohnpei, The Honorable Marcelo Peterson weliandier Wein Pohnpei oh wia ah tungol kaping kalahngan ohng Australian Embassy, pwehki sawas laud me eh wiahngehr Pohnpei State ni ah sawaskidahr wen Money ieu ohng ni kamwahulahn Pohnpei Fitness Center. Kepina pil wia ah tungoal kaping ong Pohnpei Athletics Club pwehki sawas teikan me pwihn wet wia nan ansou me doadohk en kamwahulahn ihmw wet oh pwehki pwihn wet-te me kapdelong pekpek wet nan ah tungol ohpis. Kepina pil doula oh kasalehda me Pohnpei Fitness Center pahn wia sawas laud ong pelien exercise oh pil sewese me pwulopwul kan kiheng irail ansou mwahu en kasukuhlki soangen kamwadong kan me kosondi en wiawi nan Pohnpei Fitness Center, me duwete pakir ape.

IRE KESILUH: Kasarawi en Ritidahn Sekere Multi-Purpose Gym

          Ni February 17, 2016, Governor Peterson iang patehng Ambassador en Wein Japan ni kasarawi en ritdahn Sekere Community Multi-Purpose Gym me pato nan wasa me Sekere School doandie rahn wet. Pekipek en Sekere Community Muti-Purpose Gym wet tepida nan September en pahr 2014. Ambassador Sakai ehu iengehr Ohpis en Kepina en Pohnpei ong epweldahn de wiawihdahn Sekere Community Multi-Purpose Gym. Embassy en Wein Japan nan FSM me patowanda mwohni me wiahda Gym wet.

          Kesempwal en wiawidahn Gym wet doke anahn oh sawas ong aramas, mehlel community en Sekere ong pelien kamwadong kan, pelien doadohk en tiahk de kapokon, pelien kasukuhl, oh katikala luhmwuhmw kan me kemekemehla aramas en Pohnpei kerenieng rahn karos pwehki atail sohla pereniki mwekid.

          Kepina Peterson wia ah sakaradahn kaping  kalahngan ohng Embassy en Wein Japan, Kempa en Skuhl, VCS de White Sand Construction Company oh pil koaros tohn koauson en Sekere de Sokehs me iang utung oh sawas ohng ni wiawidahn Sekere Community Multi-purpose Gym. Nan en Kepina sakaradahn rahno, epil kasalehda me pwehki kapwal en soumwahu en NCD de Non-communicable disease ah rekilahr Pohnpei eh kasik me Gym wet pahn pil sawas ni ah pahn wia wasahn kamwadong de kamwakamwakid paliwar akan pwe ren kehlail oh dehr mengeihn alehdi soumwahu.

          Kepina Peterson pil doula oh peki sawas en minimin pene en mie pwe epwel pen Sekere Community Multi-purpose Gym en kak werewerei.

IRE KAPAHIEU:  Kisin Likouhn Pekipek Sang Chief Magistrate Liemen Oh Luhkenmoanlap Tony Sarapio.

          Kepina en Pohnpei, The Honorable Marcelo Peterson aledier kisin likou sang Chief Magistrate en Sokehs, The Honorable Michael Liemen oh Luhkenmoanlap en Kitti, The Honorable Tony Sarapio me peki rehn Kepina ma tohn ara tungol wehi kan me doadohk nan State Koperment en Pohnpei kak iang komol oh wauneki Holiday en Wein Sokehs de Rahn en Sokehs Rebellion Day oh Holiday en Wein Kitti de Kitti Constitution Day en Pahr 2016. Poahson sang ni pekipek pwukat, ni February 16, 2016, Kepina Peterson kadarohngher weliepen ehu ehu ohpis kan me pato pahn Ohpis en Kepina kisin likou me kamanalahr koaros tohn doadohk me wia tohn Wein Sokehs oh Kitti nan State Koperment en Pohnpei ren doadohngki Administrative Leave pwe irail en iang kawauwih Sokehs Rebellion Day me wia ehu Holiday ong wein Sokehs. Met me wehweki school koaros nan Wein Sokehs pahn komoal ni February 24, 2016 pwe irail en pil iang kauwawih rahn kesempwal wet ong wein Sokehs.                   

          Pil duwehte Kitti, school koaros nan Wein Kitti pahn komoal Nialem, February 26,2016, pwe tohn Wein Kitti kan me wia tohn doadohk en Koperment en Pohnpei ren iang kawawih Kitti Constitution Day.                       

Irail tohn Sokehs oh Kitti kan me doadohk nan State Koperent me arail pahn komol kak elehieng mehla de kahpwal ah pahn pwarada, pahn uhdahn pwarala ni arail wasahn doadohk kan oh koadohkoh, ahpw pahn ale isais me koasondi nan kosonned oahng soangen ansou duwehte met.

IRE KELIMAUH: Idihdahn me Pahn Apwalih Kempa en Skuhl, Kempa en Roson Mwahu, Ohpis en Fisheries oh Aquaculture oh Publi Auditor.

          Pwehki ah wia ehu pwuko kesempwal ohng Kepina, The Honorable Marcelo Peterson, en idihada weliepen ehu department de Kempa, Ohpis kan oh iangahki Agency kan me pato pahn epwelpen ah tungol Ohpis, Kepina Peterson kadarohngehr Speaker Scaliem en Legislature Keduwapak, mwaren irail kan me eh patowen idiadahr. Eri iet mwaren irail kan me Kepina Peterson kadaralahngehr legislature pwe ren thek oh apwalih:

1.    Mr. Kasiano Shoniber- Pwehn pahkieng Wein Pohnpei Office of Fisheries and Aquaculture

2.    Mr. Midion Neth- Pwehn pahkieng Wein Pohnpei Kempa en Skuhl

3.    Mr. Paulino Rosario- Pweh en pwurehng pahkieng Wein Pohnpei Kempa en Roson Mwahu.

4.    Isonahnken en Wein U, Honorable Ihlen Joseph -  Pwe ren ketin pwurehng pahkieng Wein Pohnpei Ohpis en Public Auditor

IRE KEWENUH: En Kepina Tungol Seilok ong Wein Palau

          Ni February 18, 2016, Kepina en Pohnpei, The Honorable Peterson patohdahsangehr Pohnpei pwehn iang towehda mihting en Chief Executive Council en FSM me wiawi Guam(President oh Kepina 4) me pahn tepida February 19, 2016, ahpw pahn uhd douluhlahng Wein Palau pwehn iang towehda mihting en Micronesian Chief Executive Summit.                 

Mihting en Chief Executive Council en FSM, (President oh Kepina 4) kin wiawi pwehn kosonehdi anahn oh kahpwal me mie nan FSM. Met wia ire kesempwal ehu pwe wehwepene nan pwungen Kepina en State 4 oh President en FSM en sondi mwohn ahr pahn patalahng mihting en Micronesian Chief Executive Summit MCES me President oh Kepina kan en Wein Republic of Marshall Islands,Territory of Guam, Republic of Palau, Commonwealth of the Northern Marianas, Federates States of Micronesia kin towe.

IRE KEISUH: Me PId El Nino de Karakar Laud me Kipehdier Pohnpei.

          Pwehki, Kepina Keieu ah patopato Wein Palau ki pwukoh, Keriauhn en Kepina, Honorable Reed Oliver patohienger nan kahngen mihting tohto, ni ah patowen tuhongehr en President oh Kepina tungol Chairman El Nino Task Force, oh irail semen en irong mesenleng sang Weather Bureau. Tohn en Kepina tungol El Nino Task Froce audauhdkihda weliepen Kempa, Ohpis Agency, PUC oh Kaun en Koperment en nan Wehi kan.

          Lt. Governor Reed kangongehki Kempa en Roson Mwahu, Skuhk, Dorepen Wehi de me kin apwalih (Onepek/Melei en Wehi), EPA, oh PUC ren wenla nan doadohk en kapehse kahpwal en karakar. Lt. Governor Reed, kasalehda me kesemwpwal wewehn tohn Pohnpei en mie ohng kahpwal en karakar laud me tepdahr sasaihr roson, onepek oh meleilei en emen emen aramas de ehu ehu kahlap. Nan ansou duwehte met, eh konehng mehlel kitail en sapwenlimaniki de tungoleniki radio pwe pakair kan me kin wiewiawi me pid epwelpen karakar laud tohn ehu ehu ihmw en iang wewehki.

 Lt. Governor pil doula oh kaweihd Kempa en Roson Mwahu, EPA, PUC oh Public Safety ren dehr pwangada pakapakairki dahme tohn kouson kan en wia pwe ren katikala de irehdi kahpwal en roson mwahu me pahn kak pwarada sang ni samin en pihl kan. Mehntang, maspwunan oh olahn kilin aramas me mehn Chuuk repwohtki tepider pwarapwarada. Ilek kohienger Kempa en Roson Mwahu en Pohnpei State  en tehk pakairki ma kepilsalehd pwukat sang samin en pihl de karakar laud.

PUC pakapakairki nan radio me water hour nan Kolonia lelang koauson kak me iang wie doadohngki Pohnpei Water System iei me pahn sansal pah:

Ritda sang Kulok 5- 9 Nimenseng oh pil ritda sang Kulok 5-9 Nisoutik.

IRE KEWALUH: Mihting Nan Pwungen Ohpis En OIA/CMU oh Leadership en Pohnpei.

          Ni February 19,2016, mihting wiawiher nan pwungen Ohpis kan en OIA/CMU oh Leadrship en Pohnpei me pid wiepen budgetih mwohnin sawas kan me mie me pan peida de kamanamandahr oh pahn kohdo pahn kosonihn Inoun Minimin Salekek, prioject priority oh wiepen kamwakidewei project kan me tehtehn doadohk perail miehier, oh pil songen ire kesemwpwal teikan me pid epwelpen roson mwahu oh kamaraihn me Koperment en Amereica pwekada oh kesemwpwalki mehlel.                     

          Lt. Governor, Honorable Reed Oliver patehngehr irail weliepatail kan nan Legislature Keduwapak oh tuweng  tohn doadohk en Ohpis en Insular Affairs de OIA sang Koperment en Wein America oh Compact Management Unit CMU en FSM Koperment. Kahrepen weliepen Ohpis en OIA ah pwarek FSM, pwe irail en tuhweng lapalap kan nan FSM National Government oh Pohnpei State government me pid ire kan me sansalehr powe. Nan mihting kesemwpwal wet audepen kaweid oh wehwepenehn doadohngki tehtehn sent kan me pahn patohdo sang U.S. ong pahr 2017 pweidahr. Ohpis en OIA patowen wia ah kaping ohng leadership en Pohnpei pwehki sansal en minimin oh ehupene me mie met weksang ansou kan me samwalahr. Ngong oh ehupene nan doadohk mie nan Administration de mwei kapw wet. Re pil wia arail kaping pwehki Pohnpei kelehpw me kamwakidewei ah tungol doadohngki, ni pwung oh unsek, sawas me Wein U.S. kidohng en apwalih me kitail kin kahdaneki Infrastructure Maintenance Fund de IMF.

-------------------------------------------------------------------------------------------------

Met kaihmwisakalahr Kairoihr Ehute, Pohnpei Radio Program No. 6-16. Koamw onopada oh pil iang kit nan ehu soangen program wet me pahn patohdo mwuhr.

Kupwur ehu de mehmen me mie sapwelime de ah tungol iren keinemwe de kalelepak me pid ire pisetik en ire oralap kan me sansalehr, komwi kak mahsendo patodohng ni ohpis en Public Affairs Office, telephone number 320-2570 de Ohpis kan me apwahpwalih ehu ehu ire oralap kan me sansalehr nan radio program wet.

Kalahngan oh Kaselehlie.

 

 

 

 

 

 

 

 

 

 

RONGEN POHNPEI

( Sang Ohpis en Kepina: Kolonia, Pohnpei, Federated States of Micronesia FSM)

IRE KEIEU, Kaulahn Peace Corp Volunteer Kapw Ehk Pahmen 14.

 

Ni February 8, 2016, Lt. Governor, Honorable Reed Oliver weliandier Kepina Peterson oh iang towehda kasarawi en kaula ni Tuna Commission Multi-Purpose Center ong irail Peace Corps ehk pahmen 14  me pahn sawas nan FSM oh Palau. Irail Peace corps 14 wet nehnedingehr Republic en Belau oh State en FSM kan. Irail meh wenemen 6 pahn kohla Chuuk , emen 1pahn kouson Yap, pahmen 4 pahn sawas Pohnpei, oh 3 silimen pahn wia arail pwukoh Palau.

Irail meh pahmen 4 me pahn sowese Pohnpei, silimen 3 pahn mih pahn Kempa en Kamarain, oh emen 1 me Kepina Peterson pekihdo pahn mih pahn Ohpis  en AG pwehn sewese apwalih kahpwal en fraud, de kemwekid en tohn doadohk  kan me kin uhoang koasondi pwung en doadohk kan en Kopermenet.

Ni kasarawi wet, Lt. Governor wia ah tungoal sakaradahn kaping oh kalahngan ong Peace Corp Micronesia pwehki sawas me pali wet kin  wia ong kihlongodo irail volunteers kan pwe ren sawas nan palih en kaskuhl oh pali teikan me arail tungol kohiek inenen laud loale.

IRE KERIAUH, Kasarawihn Sdosahn Wiengi Me Pahn Kin Tangewei Rehn Aramas Nan Skuhl oh Koauson Kan.

Ni February 8, 2016, Kepina Keieu, The Honorable Marcelo Peterson iangehr towehda kasarawihn Dental Mobile Clinic Trailer de ihmw me pato pohn daia me tohktehn wiengi oh dipwsouhn wiengi unsek pahn dake pwe ren pwarek skuhl oh koauson kan. Sawas wet pweidahr sang ni sawas kapatapat en MAHI International oh Embassy en Australia, me sapankihda tehtehn sent de mwohni me alehda trailer en wiengi wet oh four wheel truck ieu me pahn kin ruwadekiwehng ni skuhl de kouson kan. Nan kasarawi wet, pali riauh me sansal kasapwil ohng Kepina oh Kempa en Roson Mwahu dipwsouhn doadohk pwukat.

Kepina Peterson wia ah tungol kaping ohng palih kan me sawaspene karehda elen kamengei wet ah miehier, me pahn apwalih mehlel tohn skuhl oh tohn kouson kan me kin kak apwalki pwaredohng ni washn wiengi nan Kolonia.

 

 

 

IRE KESILUH, Koson Sapahl en Ohpis Kan Pahn Kepina.

Ni February 5, 2016, Kepina Peterson kadar ohng Speaker Scaliem ah koamwomwadahn koason sapahl ohng ohpis kan pahn rahn kakelaka kosonned me Kepina moange.

Nan koamwomwada wet department kapw riauh me pikida, iei me iangahki Department en Resources and Economic Development oh division kan pahn Department wet iei me iangahki, Division of Agriculture, Division of Forestry, Division of Tourism and Historic Preservation oh Project Planing and Implementation, oh Department of Justice oh division kan pahn Department wet iei me iangahki, Division of Law & Litigation, Registrar of Corporations, Division of Police and Security, Division of Correction and Rehabilitation, Division of Fish and Wildlife, Division of Fire and Emergency Services. Nan en Kepina ah tungol kisin likou ohng Speaker me pid met, eh kasalehda me Department of Treasury and Administration tehker oh kasalehda me ah koamwomwadahn wekidekla pahn pweitikitik sang dahme mie rahn wet ki tala rienen, wenekid, limepwuki eisek limauh $26,515.

IRE KAPAHIEU: Weliepen State en Pohnpei nan Board of Directors en PetroCorp oh FSM Telecommunication Corporation.

Ni February 8, 2016, Kepina Peterson kadar ohng Speaker en Legislature Keduwapak, The Honorable Fernando Scaliem, ah tungol ihihda pwukat pwe ren apwalih oh kiheng arail kosondi en kamanaman.

  Mr. Pius Roby en iang towe FSM PetroCorp Board of Directors.

  Mr. Richie Adams en iang towe FSM Telecommunication Corporation Board of Directors.

Met kaihmwsakala Kairoihr Ehute, Pohnpei Radio Program No. 5-16.

 

Kupwur ehu de mehmen me mie sapwenlime iren kalelepak me pid ire pisetik en ire oralap kan me sansalehr, komw kak mahsendo ni Ohpis en Public Affairs ni telephone number 320-2570 de Ohpis kan me apwahpwalih ehu ehu ire oralap kan me sansalehr nan radio program wet.

Kalahngan oh Kaselehlie Maihngko

 





Contact us for more info


image


image

Outer Island Chiefs and Executive Officers Deliberate on their Pressing Issue...read more=>

Petition to assist with the Dissemination of Election Information...read more=>

 


MAHI Intl. Turn Over Ambulance and Beds...read more=>

ROTARY CLUB OF POHNPEI TURN OVER TO GOVERNOR EHSA SOME GOODS...read more=>

GOVERNOR EHSA SWORN-IN NEW BOARD OF DIRECTORS FOR PPBC...read more=>

 

Governor John Ehsa Inked Two Legislature Bills Into Law-(Peilapalap, Pohnpei State Information Services)read more=>

imageWelcome to the Governor of Pohnpei Website........>Kaselehlie......>Pohnpei Met!
image