Image
image
image
image



 


PNI MET RADIO PROGRAM TOHROR ORALAP NO. 6-17-15

 

Iheng oh kaselehlie maingko.

 

Re ketin kupwure, pwe ien kak pahda sapwelimomwail Ohpis en Kepina oh sakasakarkihda audepen rohng kan nan “Pohnpeimet” Radio Program  Tohror # 6-17-15.

 

Eri mwohn ei pahn patohieng nan ahi tungoal sakarada, eh konehng mehlel ien tiengki ahi tungoal keipwenih pahn kupwur en samatail kauhno koht.

 

Ahi tungol keipwenih pahn kupwuren Ereksoh ko en Pohnpei Uh.

 

Ahi tungol wahulap pahn kupwur en Isonahnken ko.                               

 

Wauhneki sapwelimahr Likendko/ Nahnaleko, Nahnkenieiko, ahi tungoal wahu en pil doake sapwelimahr wekidi teikan en Nanwouhn Kerehlap.         

 

Ahi tungol wahu pil doke Oloisoh kan sang Wasahi patohdi, oh Serihsoh kan sang Nahalimw patohdi, Soaumas en Koausapw oh Peliendal akan.

                                                    

Ahi tungol wahu tohror doke mehlel Kepina Keieu, Keriauhn Kepina oh tohn amwa tungoal cabinet, Speaker en Legislature Kewelipak, oh iengemwih kan, Souhn Kopwung Lapalap oh iengemwi souhn koapwung kan. Ahi tungol wahu tohtohr pil doke moangemongen rah siluh kan en koperment en nan wehi kan, oh iengemwail kan, oh karos me wia pwilidak, uhdak oh irail menin peidoh kan.

 

Ahi tungol wahu tohrohr en pil doke lengleng keidi kesempwal koaros nan pali en Government, Tiahk oh Mwomwohdso

 

Me pahn pahkin ihr nan program en rahn wet iei ngehi Mr. Heinrick Stevenson, Public Affairs Officer en Koperment en Pohnpei, me pil wia Peliendal en Kousapw Pohsein nan Wein Kitti oh me pil kepinkonotki sang Soukisehleng, Nahnmwari en Wein Kitti,  Nahnpeinkep Onohnleng.

 

Re ketin ket nan radio program tohrohr wet.

 

Pohnpieimet Radio Program No. 6-17-15, wia program tohrohr ieu pwehn kawehwe doadohk en impeachment me wiawi nan sapwenlimen Pohnpei Pwihn en Koaukosonned (Pohnpei Legislature Kewelipak) Niare, June 16, 2015.

 

Pwehn kol wehwe, meleilei oh onepek mwahu nan Wein Pohnpei rehn sapwenlimetail aramas akan, ah iei karepen Pohnpeimet Radio Program tohror wet.

 

Iretikitik 6, Ire Pwidikidik 1, en Iralaud 13, en Pohsoan de Nohnon Kosonned en Weipokon en Pohnpei koasoanehdi me ire pahieu me Kepina, Keriauhn Kepina, Public Auditor, tohn pwihn en koaukosonned, souh koapwung kan, oh karos me idihda kak impeachki:

 

a.    Wiewia sapwung nan ohpis.

 

b.    Sohte wia ah pwukoh.

 

c.    Soumwahula.

 

d.    Dipekihda dihp me kandandsuwedihala ih.

 

Nan ei tungol program tohror wet pahn sang nan iren pah kan pwe ien kak kawehwe mwahu ohng tohn wehi alahldahn Impeachment Resolution No. 39-13., me introduce de koapdolong nan legislatue ni February 26, en pahr 2013, pahr riauh me samwalahr. Eri iet ire me ipahn saihr nan sapwenlimetail Poahson, Kosonned kan me koasonehdi perekwehn doadohk en impeachment, oh resolution en impeachment.

 

a.    Iralaud 13, Iretikitik 6 en Poahsoan en Kosonned en Pohnpei, me koasonehdi wiepen impeach lapalap en koperment

 

b.    S.L.No. 3L-40-93, me kosonehdi perekwehn doadohk en impeachment.

 

c.    S.L. No. 5L-58-2001, me wekidala S.L.No.3L-40-93, me kosonehdi perekwehn doadohk en impeachment.

 

d.    Impeachment Resolution No. 39-13, me sapwenlimetail souhn koaukosonned kan aledahr me impeach Kepina John Ehsa.

 

Niare, June 16, 2015, Legislatue Kewelipak adopted de aledahr Resolution No. 39-13. Inengin resolution wet en impeach de kadaudih Kepina Keieu, The Honorable John Ehsa sang nan pwukoahn wia sapwenlimen Pohnpei Kepina Keieu. Ni usuhs sansal, kasaledahr me irail meh 19 me towe session de mihting en Niare, June 16-2015, karos us EIH de utung Resolution en Impeachment, oh irail me sohte usuhs pwehki re sohte iang towe session de mihting iei Senator Nakasone, Senator Edgar, Senator Helgenburger, oh Senator Yamanguchy.

 

 

Ansou kiset ipahn saihr S.L.No. 5L-58-01, me wekidala S.L.No. 3L-40-93, me apwalih perekwehn doadohk en impeachment.

 

Pwe Resolution No.39-13, en alehdi kamanaman en legislature, silikis riauh en toweh kan pahn anahn, me wewehki meh ehk welimen 18 sang nan irail towe riehk silimen 23 ni sohte pohnese irail kan me sohte iang session de mihting.

 

Poahsoan en Kosonned oh Kosonned kan en Wein Pohnpei koasoanehdi me mwurin alahldahn resolution en impeachment nan legislature, Speaker en Legislature pahn file de kapdelong nan Mwoalen Koapwung Ileile en Pohnpei resolutiono, oh pil file de kapdlong copy en resolutiono rehn me impeacho. Me impeacho  pahn koamoldi sang nan ah pwukoh, ahpw pahn alealehte ah salary lahu lel ansou ieu me pwunglahn koapwung pahn  sansalada. Kepina, mie impeachment wet doke, mwurin ah pahn serve de ale Resolution en Impeachment sang Speaker, epahn tungoaleniki rahn silihsek 30 pwehn kapdelong ah tungol pasapeng ni inting ohng ehu ehu Article en Impeachment de pakarauhn en dihp me sansal nan Resolution 39-13.

 

Mwurin Kepina ah pahn uhoang pakarauhn kan nan resolution, Tribunal de mwoalen toanoak ehu me audauhdkiha souhn koapwung silimen pahn koasonehdi rahn en koarongorong. Nan koarongorong,Tribunal de Mwoalen Tenek en Souhn Koapwung silimen pahn alehda de sohte alehda uhoang kan. Me pid dahme tribunal sohte alehda, Kepina pahn ahneki rahn 20 sang rahn me karongorong wiawi pwehn kapdelong ah pasapeng, (Iretikitik 8 en S.L. No. 5L-81-01.)

Nan rahn 30 mwurin pasapeng, Tribuanal pahn kihda order ieu me pahn kasalehda dahken me pahn wiawi nan kopwung. Koapwung pahn wiawi sohte mwadangasang rahn 60 oh sohte pwandasang rahn 90 sang rahn me order en tribunal wiawi, (Iretikitik 9 en S.L.No.5L-58-01)

Sapwenlimen Pohnpei Poahson en Kosonned Iralaud 13, Iretikitik 6, Ire Pwidikidik 4, koasonehdi me ni impeachment ah lelehr Mwoalen Koapwung Ileile en Pohnpei, Chief Justice pahn kauada Tribunal Court de Mwoalen Koapwung ieu me pahn audauhdkihda soun koapwung silimen. Tribunal wet pahn rapakihda oh idihada special prosecutor men de souhn kadip tohror me pahn pekederieng legislature pwehn ale kamanaman en pali moron en legislature, ni sohte pohnese me sohte pwaredohng session de mihting.

Kosonned en Weipokon No. 5L-58-01, koasonehdi me neihn legislature souhn kadip tohrohr pahn pweipwei sang legislature. Kepina, me impeach pahn pein pwaihn ah tungol soun sawas, oh ma epahn kana ah Koperment pahn welian oahng ah tungol sent kan, (Iretikitik 17 en Kosonned wet.

Ipahn ansoukiset kasalehda pakarauhn kan me sansal nan resolution en impeachment no. 39-13, me iangahki floor amendment 105-15 ah patoahnger.

a.    Article en impeachment de pakarauhn en dihp no.1-7, eh pid en Kepina Ehsa doadohk en kamwenge serihn skuhl en elementary kan.

 

b.    Article en impeachment de pakarauhn en dihp no 8-12, eh pid en Kepina doadohk en apwalihada sapwenlimen Pohnpei Strategic Development Plan.

 

c.    Article en Impeachment de pakaraun en dihp no.13-15, eh pid epwelpen PUC ni ansou me Pohnpei ketieng nan kahpwal en liol.

 

d.    Article en impeachment de pakarauhn en dihp no. 16-17, eh pid alahldahn consultant ohng OFA.

e.    Article en impeachment de pakarauhn en dihp no. 18, eh pid lease en Mitjui Mulsang.

 

f.     Article en impeachment de pakarauhn en dihp no. 19-25, eh pid mwekid en pwuhng nan pwungen Kepina oh Luen Thai Company.

Pwehn pil sansal ohng weipokon, impeachment siluh me wiawiher nan State Koperment en Pohnpei.

Keieu oh keriauhn impeachment trial de koapwung sohte nekla, ah kepilsalehdala mie oh term de diehn ansoun doadohk imwsekla.

Me doke Kepina John Ehsa, iei kesiluh en impeachment oh kitail pahn tehk dahme pahn kak pweida.

Pwe edepahn mie iren peidek rehn tohn usuhs kan, pwehki mwaren Kepina John Ehsa ah iang pato nan ballot de kisin likouhn usuhs ohng Congress At-Large ni 1 en July, 2015, Kepina men sekerehki wehi, ahpw mehlel tohn usuhs kan en Pohnpei me sohte mehkot wekidala koasondihn doadohk wet.

Met kaimwsakalahr Pohnpeimet Program tohror oralap no. 6-17-15

Kalahngan, oh komw kin ketin kapakapaidoke sapwenlimomwi de omw tungoal radio pwe komwi en ketin de patowen iang kit nan ehu soangen radio program wet me pahn patohdo mwuhr me pan kin kasalehda ire oralap kesemwpwal kan me mwekimwekid nan Ohpis en Kepina.

Met kaimwsekalahr  Pohnpei met program tohror no. 6-17-15. Ma mie sapwenlimomwi de omwi iren keinemwe de kalelapak, komwi kak moalpe de eker telephone de dengwa #320-2570, de ohpis kan me arail pwukoh pid ire wet.                                                     

Kaselehlie.

 

 

 

 

 




Contact us for more info
 

image

imageWelcome to the Governor of Pohnpei Website........>Kaselehlie......>Pohnpei Met!
image