Image
image
image
image


Pohnpei Met Radio Program
 


Pohnpeimet Radio Program No.7-01

Ahi tungoal sakar en mesik pahn kupwuren samatail Enihlap me ketin ieiaseki roson unsek en kupwur poalloal, reseulap oh sepekenko en ketin kaipaip pohn Kahlap/Erekiso ko en Pohnpei uh.  Ahi tungoal sakar en wahulap pahn kupwuren Iso Nahnken ko, Likend oh Nahnalekko, Nahnkeniei ko.  Pil ahi tungoal wahu tohrohr doke Kepina, Speaker oh towe kan en Pohnpei State Legislature Kewelipak, Sounkopwung Lapalap oh iengomwi kan, oh keidi tohrohr teikan en palien tiahk, mwomwohdiso, oh dakehn government siluh kan en National, State, oh Local Governments kan.  I pil men patohwan pohnese tohn Pohnpei unsek sang deke Pingelap lel Kapingamarangi.

Met iei Pohnpei Met Radio Program me kin kaonopada sang ni ohpis en Kepina pwehn kin kalekalelehki tohn Pohnpei unsek ire kesempwal akan me kin pwarapwarada nan Government en Wehin Pohnpei.

Nan sapwellimatail program keieu wet pahn pida mehlel ire pwukat:

1..KEPINA EHSA KETIN IDIHADA MR. YALMER HELGENBURGER.

 

Ni July 6, 2012, Kepina Ehsa kalelehki Speaker en Legislature Kewelipak, The Honorable Peter M. Lohn me eh idiadahr Mr. Yalmer Helgenburger pwehn uhd apwalih Ohpis en Fisheries oh Aquaculture, ohpis ehu me pwukohki ropada oh apwalih elen paih kan me kak kohsang ni wahn sehd.

Nan en Kepina kawehwe mwahnakapw menet ohng Speaker eh kasalehda me Mr. Helgenburger sohte kapw ohng pahki pwukoh wet nan State Koperment en Pohnpei. Kepina doula oh kasalehda me eh wiahier Administrator en Ohpis en Economic Affairs nan ereihn souhnpar pahieu nan en Kepina Johnny David mwehi ansou ehu me pwukohn Fisheries mihmi pahn Ohpis en Economic Affairs.

 

Kepina ketin doula oh kehsehki Speaker Lohn me kohiok kan me eh ahnekier ni ah wia emen Cabinet Officer me pwukohki fisheries mahs iangahki pwukoh kan me eh tungoaleniki nan peskiness kan oh iei ih me keieuhn aramas en Pohnpei me lemehda  mwetwelih mwahmw nan Wein Pohnpei. Kadehde pwukat kamehlelehda me Mr. Yalmer patowen ahneki kak laud en uhd pwukohki Ohpis en Fisheries oh Aquaculture.

 

2. JICA VOLUNTEER COORDINATOR PWAREK KEPINA EHSA.

 

Mr. Kiyofumi Yoshida me rahn wet wia JICA Volunteer Coordinator, Steezia Aldis, Assistant Administrator Officer, oh volunteer kapw Tomonon Honda me pahn kohla ni skuhl en Awak, oh Tomoko Mitjuhazi me pahn kohla Ohmine skuhl pwarek Kepina Ehsa Niepeng,  July 12, 2012.

 

Kahrepen Ohpis en JICA ah pwarek Kepina Ehsa pwehn kapehse Japan volunteer kapw riemen me sansal. Mr. Yoshida kasalehieng Kepina me wiepe wet kapw oh iei me pahn kin wiawi sang met kohla ni Japan volunteer kapw ohng Wein Pohnpei ah pahn kin peidi pwe ren doadohk.

Kepina Ehsa wia ah kaping ni ah kalahngan ohng Japan JICA Ohpis, oh nah tohn doadohk koaros iangahki irail kan me pwarekehr Kepina.

 

Kepina Ehsa doula oh kasamwoh volunteer Honda oh Mitjhuazi oh doula kasalehda me sawas en Japan volunteer iang kakaihrada mouhr mwahu oh paih en en Wein Pohnpei.

3..Sahi en Ropirop Tohrohr Ehu Ong Deke Pingelap oh Mwoakilloa:

Niepeng, June 28, 2012 sahi tohrohr ehu wiawilahngehr Deke Pingelap oh Mwoakilloa.  Irail kan me towe sahi tohrohr wet iei:  Honorable Marcelo K. Peterson, Keriau en Kepina me patohwan moangedahr.  Met pwehn ropada wen tohto en menihke me adaneki “Matop” (de sea cucumber) ma iei e pahn kak netla ohng company ehu Taipei, nan Wehin Taiwan pwehn kak wia elen kapai ong tohn dekehn likih  kan iangahki ni kahlap en Pohnpei.

Irail oko me iangehr towehda sahi tohrohr wet iei: Mr. Sherman Lee, Weliepen company, Mayor en Pingelap Honorable Makir Keller, Weliepen Chief Magistrate en Mwoakilloa, Mr. Joannes Sepety, oh weliepen Ohpia en Fisheries oh Aquaculture (OFA), Mr. Itaia Fred.

Dahme tohn sahi wet diarada me menihke Matop oh ekei me pil duwehte “Matop” inenen rek mehlel pohn deke Pingelap.  Re diarada me pohn deke Mwoalikoa Matop sohte rek.

Semen kan kasalehda me Matop kin kak podidi oh dondol nan souhnpwong 6 karos. Matop lauhd men ni ah pahn lop peseng wiahda 2 oh poad, nan souhnpwong 6 Matop ehuo pahn dondol wiahda Matop 2.

Pwehki Ohpis en Kepina ah kin patohng government en nan wehi kan  raparapahki elen kapaih kan, met eledahr, Lt. Governor, Honorable Marcelo K. Peterson, ah tuhong her (Council en Local Chief Executive Ohpiser kan) pwe ren iang wewehki audepen kedierekda kan ong menihke “Matop”. Me towehda wielamalap tohrohr wet iei:

Honorable Marcelo K. Peterson, Keriau en Kepina, Honorable Petrick Ringlen, Chairman en Council en Local Chief Executive Ohpiser en Pohnpei-Meninkeder Lapalap,  Honorable Casiano Shoniber, Mayor - Kolonia Town, Honorable Michael Lieman, Chief Magistrate - Sokehs, Honorable Adelino Edmund,District District Administrator - Nett District Government,   Honorable Makir Keller, Mayor - Pingelap Municipal Government,  Honorable Toshuky Rudolph, Mayor, Nukuoro, Pesnesman Mr. Sherman Lee sang Taipei, Taiwan, Weliepen Pohnpei Conservation Society (CSP), oh Mr. Tony Martin, Local Governments’ Liaison Officer.

Nan wielamalam tohrohr wet Lt. Governor, oaralapehda audepen sahi tohrohr me wiawilahng dekeh kan en palimese (Pingelap oh Mwoakilloa).  wielamalam koasoanedier me kaweihd en kangederehla soangen menihke “Matop” en wiawi. Kaweihd wet pahn sang Mr. Lee oh Ohpis en Fisheries oh Aquaculture.         

Kasukuhl tohrohr ehu wiawier nan ohpis en Fisheries oh Aquaculture OFA me weliepen ohpis wo iangahki Mr. Lee patohwan patkipenehr oh wiaier ong ekei tohn wehi kan me patopene.

Kaskuhl doke wiepen nahk songen menihke wet pwehn dehr mwomwla oh  pil saihr wiepen kamwakelehda oh kaunopda ohng netla oh pekeder.

State Government iangahki municipal government kan kamehlele me pweidahn pesines en Matop pahn wia ehu elen kapaih ohng tohn Pohnpei.

E pil koasoandier me mwekid en ropirop tohrohr ohng menihke “Matop” pil pahn wiawiheng dekehn palipah kan (Sapwuahfik, Oreluk, Nukuoro, oh Kapingamarangi).  Ni oaralap, ropirop wet pahn doke wiepen kangederehla, rikada, kamwakelehda oh pwehn kak netila.

Nialem, July 6, 2012 wielamalam tohrohr en Council en Local Chief Executive Ohpiser kan wiawier nan wasahn mihting  en Riverside Restaurant oh karos towehda. Kahrepen mihting wet pwe Ohpis en Kepina en kin kapehse ireh kan me Koperment en nan Wehi kan pahn kin anahne ese. Me pil iang towehda mihting wet iei Mr. Lee souhn pesines en alehda menihke “Matop.”, weliepen Ohpis en Japan International Cooperation Agency (JICA) me kin kihda sawas en sent de grant oh, Public Health Emergency Prepare Project (de PHEPP) iangahki Mr. Tony Martin, Local Governments Liaison Officer.             

Nan mihting wet Mr. Lee  kehsehki Local Chief Executive Ohpiser kan me e pahn patohdahsang Pohnpei   ni July 8, 2012, oh pahn pwurodo ni July 25, 2012, pwehn uhsehla dahme e patohwan tapiadahr.  E doula oh kasalehda me epahn pwuredo oh doudihla ni dekehn palipah kan pwehn tehk ia wen menihke Matop me mie.

Weliepen JICA me iang towehda mihting kasalehda me mie elen sawas en sent (de grant) me ohpis en JICA kin kak sawaskihda ong ni alahldahn dipwisou en projects kan en paliesed.                                                 

Pil nan mihting wetoa, weliepen PHEPP pil kawehwe oaralap dahme ah pwukoh. Pali wet me kin pwukohki kapehse oh kasukuhlieki pali kan oh tohn kousoan akan duwen kaunopada oh apwalih (luldahn ihmw de wasa kan, melimel, engk en sahpw, rerrer en sahpw, lapake, ilok laud, de loaladahn uh, ape).  Mahsenpen ire wet wiawier oh pahn koasoandiong ehu rahn wiepen soangen kasukuhl de kapehse wet en wiawi pwehn lelahng nan kousoan kan.

4. Kapehse  Sang Ohpis en Public Affairs

Ohpis en Public Affairs kapehse me Mr. Antonio (Tony) Martin alahldahr en wia Local Governments’ Liaison Officer, pwehn weliandi  Mr. McGarry Miguel me wialahr emen legislator, me kin pwuohki pwukoh wet rahn teio nan Ohpis en Kepina. Mr. Martin kasalehda me epahn wia ah kak koaros pwehn sewese Koperment en nan Wehi kan pwehki met wia kisehn ah pwukoh kan. Epil pwukoahki nanpwunge Ohpis en Kepina oh Mwoalen Wahu, iangahki kapwil Pohnpeimet Radio Program.                                 

Ohpis en Public Affairs pil doula oh kapeshse me elen sawas tohto mie nan ohpis en Rural Development me municipality, Town oh District Government kan kak iang paiheki oh kaweihd ren alehdi mengihtik kan sang ni Ohpis en Rural Development. Public Affairs Ohpis doula oh kangongehki Council en Local Chief Executive Ohpiser en luke kaun en pali wet nan mihting en mwuhr.

5. Resolution Ehu Me Sang Council en Local Chief Executive Ohpiser.

Me kairala ire kan nan wielamalam Council en Local Chief Executive Ohpis, iei adoption de alahldahr  pekipek (de Proposed Resolution) ehu me ni oaralap peki ni Ohpis en Kepina en kasapwil manaman oh pwukoah kan ong ni epwelpen imwen government ohng Council en Local Chief Executive Ohpiser.

Eri, maingko, iei ire pwukat me kairalahr audepen sapwellimatail Pohnpei Met Radio Program #7-01, oh kaselehlie.





Contact us for more info


image


image

imageWelcome to the Governor of Pohnpei Website........>Kaselehlie......>Pohnpei Met!
image