Image
image
image
image


Pohnpei Met Radio Program
 


Pohnpeimet Website Program No. 7-2

 

Iei eden program en kapehse kesemwpwal wet Pohnpeimet Website Program me kin koaunopda sang ni Ohpis en Kepina pwehn kin kalekalelehki tohn Pohnpei unsek ki ire kesempwal akan me kin pwarapwarada nan Government en Pohnpei.  

Iren pahn kan iei me pwarada nan cabinet meeting ehu me Kepina Ehsa ketin eker ni Niare, July 17, 2012:

Ire Keieu:

Sang Honorable John Ehsa, Kepina Keieu me pid World Park Master Plan.

Kepina Ehsa ketin kaping ohng kauhn oh toahn doadohk kan en Kempa oh Ohpis kan me sewesehier semen kan en World Park Master Plan kanekehla audepen plan wet. Kepina ketin kasalehieng cabinet ohpiser kan me nan sounpwong en September en pahr wet draft de koamwomwadahn plan wet kakehr nekla, oh mweihn nan December 2012 , soahng koaros pahn pekederiong Pohnpei State Legislature.  Mwurin Plan ah kamanaman,   ketdilap” ehu pahn wiawi.      

 

Ire Keriauh:

 

Sang Kempa en Mwohni me pid Pweipweidahn Tehn Pwoht Aluminum.                                                                                

 

Mr. Thomas Pablo, Director en Ohpis en apwalih mwohni, tohn doadoahk oh imwen koaperment kan kawehwehda kahrepen uhdihn alahldahn tehn pwoht en saida oh pihru.

 

Mr. Pablo kasalehda me legislature oh Kepina kamanadahr wen tala $50,000. sang nan sapwenlimen Pohnpei Kopwou Lap en mwohni pwehn tapiada doadoahk wet me pahn sewese kamwakelehda Pohnpei, (S.L.No.2L-96-11).

 

Director en mwohni kasalehda me mwohni wet pahn kin doadoahkla oh pil welwelialihlong ni peskiness kan me kin import de kapdolongodo pihru oh saida ahr pahn kin pwaihn fee me sent $0.06 pohn oapwoat pihru de saida oh nan sent $0.06 wet, sent $0.01 pahn apwalih operation de doadohk kan me pahn wiawi pwehn kapwaiada kamwakeleh sang tehn pwoht me aluminum (saida oh pihru) nan Pohnpei.

 

Mr. Thomas Pablo pil doula kasalehda me ah Ohpis pahn kin rikada ahn peskiness kan pwaihs ni 15 en souhnpwong koaros, ahpw mehlel rikirikda pahn kin pahsan peidohn sohp me kin wa en pesines kan pihru oh saida. Matson Shipping kasalehda me sohp en wesik kepwe kin peidi

nan wihk riauh koaros. Ma sohp pwot kin wa en pesines ehu de pesines kei piru de saida Kempa en Mwohni kin uhdahn wewehki.

 

Director Pablo kasalehda me $50,000. me kosonned kamanalahr, $3,000. me luhwe. Ansou me iengen sent wet pahn rikirikdahr sang pesines kan Kempa en Mwohni pahn pwurehng pakairki rahn me tehn pwoht pahn pwurehng alahlda.

 

Emen tohn doadohk nan Kempa en mwohni Mr. Andrew Joseph, Chief en Finace kasalehda me epahn esehda mwurin mihting  wen sent me rikirikda sang pesines kan  nan souhnpwong en June.

 

Kitail pahn kaping ohng Kepina, Legislature, Council en Local Chief Executive, EPA, Pwihn kan me kin iang apwalih mwahu en ni limetail Pohnpei, Kempa en Mwohni, oh mehlel irail me rikada aluminum tehn pwoht kan.

 

Ire Kesiluh

 

Sang Ohpis en Economic Affairs me pid Project Kesemwpwl Siluh.

Keieuhn project,  iei Doakohieng Pilen Pwihk Ohl Pwehn Kaliseianih Pwihk Lih (Swine Artificial Insemination). 

 

Nan Cabinet Mihting en Niare, July 17, 2012, Kaun en Ohpis en Economic Affairs, Mr. Kadalino Lorens kasalehieng Kepina, Keriauhn Kepina oh iengeh cabinet ohpisers kan me rahn wet pali en Agriculture pahn epwelpen eh tungoal ohpis oh Land Grant COM Pohnpei CampusFSM, ehukipoanoahr  oh tapihadahr sahpis en kapar pwihk de artificial insemination ohng karos me  anahne. 

 

Eh kasalehieng Pohnpeimet me sawas wet FREE de sohte pahn pweipwei ahnsouwet.  E doula oh kasalehda me Legislature oh Kepina kamanadahr  wen sent ehu me patopato ni $7,500.00 oh iei mwohni wet me pwainlongodo pilen pwihk ohl sang wein America iangahki tehteh kan me doadoahk.

 

OEA Administrator, Mr. Kadalino Lorens kawehwehda me irail me sapwelimaniki de tungoleniki pwihk lih de lidep me anahnehier kaparapar, pahn lelodohng ni ophis en Laned Grant Pohnpei Campus pwe irail soundoadoahk kan pahn tehkada oh apwalihada.  Mengihtik en wiepen kapar pwihk wet pahn kak alahldihsang ni ohpis en COM/FSM Pohnpei, campus ni telephone #320-5731 de ohpis en wahnsahpw, Bunzo telephone #320-2400.

 

Keriauhn project en Ohpis en Economic Affairs iei Biogas.

 

Met iei sawas ehu sang Koperment en Peoples Republic of China (PRC) me doke wiawidahn doadoahngki pwisehn pwihk pwehn wiahda lioal, pil kaoke dengki oh wiahda pilakarakar oh gas stove ohng kuk. Koadohkpen project wet pahn tepda nan souhnpwong pahn wadet ohng aramas riehk me pekiher oh alehdier kamanaman. Project wet pahn wereiki souhnpar riauh. Oaritik en project wet kak alahldi ni Ohpis en Wahnsapw, Pwunsoh nan Kolonia.

 

Kesiluh en Economic Affairs Office Project, iei Koiasihki Pwisehn Pwihk me Dipen Rasaras Doaloa.

 

Met iei wiepen epwel pwihk me sohtoa pahn doadohngki poatoapoat pihl pwehn kamwakelehki kelen pwihk kan ahpw uhd doadohngki dipen rasaras de dipen tuhke meng lekidek ieng nan kehlakan.

 

Ohpis en Koperment en Japan nan FSM (JICA) me pato Pohnpei sawaskidahr $61,550. pwehn pwaihnda mesihn 2 me mehn waih kan kin kahdaneki (wood chipper) me kin kapisetikihdi tuhke oh the kan. Kamwahupen doadohngki dipen tuhke meng de dipen rasaras nan kehl en pwihk kan iei:

 

Katikala kahpwal en samin nan pihl de pohn oaroahr kan, dipen rasaras pahn wiahla mehn koiasi mwahu ohng wahn sahpw akan, katikala wen pihl me doadohk, oh katikala tohtohn loang oh pwohsuwed sang pwusehn pwihk. Oritik en project wet kak en alahldi ni Ohpis en Wahnsahpw de Pwunsoh.                                                                                

Ire Kapahieu

Sang Kempahn Kamarain (de Education):

Mie pil ehu program  sang FSM National Government me adaneki, “Teacher Certification Examination (de TCE).”  Souhn padahk men pahn tungoaleniki degree oh pass test de skeng wet pwe ren kak wia souhnpadahk mwahu men. Director en Skuhl repwoht ki me nan Pohnpei irail sounpadahk riehk (20) me saikinte kapwaiada anahn wet.

Eh sansal sang Director Villazon me Micronesian Teachers Education Conference me irail sounpadahk/principal pilipil kan en FSM wiawier nan Weihn Yap  imwseklahr. 

Director kasalehda me Conference wet alehda soangen skeng de tesk ieu me Susan Moses wiahda pwehn sohng en aramas emen ah kak wia souhnpadahk mehlel nan perehn skuhl kan, oh iei skeng wet me pahn weliandi dahme souhnpadahk kan kin alahle rahn pwukat.  Souhn padahk men pahn tungoleniki degree oh pass test wet pwehn kol koapwoaroapwoar en Kempa en Skuhl oh peneinei me eh kak padahk nan perehn skuhl kan.

Kasukuhl tohrohr ehu wiewiawiher nan summer et oh epahn wereiki wihk pahieu (4) ong irail serihn sukuhl en Pwihn Kewaluh kan me iangehr ale sikeng de test en pidolong nan high skuhl rahpw sohte pass.  Met pwehn sewese soangen seri pwuko oh kapwurehiong irail sikeng de test wo oh ma re pass re kak iang pidelong nan high skuhl kan. Kasukuhl tohrohr wet kereniongehr imwisekla.

 

Sukuhl pahn pwurehng tepda wihk kesiluh en sounpwong August, 2012.

Petehkpen ehu ehu sukuhl kan pahn wiawi ma re kakehr tepida de soh.

Principals Academy ehu wiawier nan Summer en pahret.

Kaun en Skuhl kasalehda me wiepen pilada Valedictorian pahn epwel keneinei nan pahr me pahn kohdoh kan. Wiepe me emen wadek en seri me wia Valedictorian kapahrek de speech sohte pwung oh pahn epwelda.

Ire Kelimauh.

Sang Kempahn Roson Mwahu:

Acting Director en Kempa en Roson Mwahu, Dr. Elizabeth Keller kasalehda me wielamalamlap en toahkte kan en nan Lepinsed en Pacific koasoandiongehr en wiawi Pohnpei tepda Niehd, July 23 lel Niepeng, July 26, 2012.

Acting Director kasalehda me soumwahu en suke wia kahpwal laud nan Pohnpei rahn pwukat.  Met iei me elehda pwihn en tohke en nan lepin sedin Pacific arail koasonehdi ren wia arail mihting Pohnpei. Eh kedierekda nan roprop me nan Pohnpei me nan pwungen aramas limmen (5) karos, meh riemen ahneki soumwahu en suke.

Program en ropirop ehu ong soumwahu suke pahn wiawi August 10, 2012.  Oaritik en ire wet kak en sansal sang Kempa wet.

Dr. Keller kasalehda me Kempa en Roson Mwahu alehdier sawas en mwohni ehu me pahn kawada sahpis tohror oahngete irail me soumwahu en suke. Wasa kiset pahn mi nimwen wini en Pohnpei, oh tohn doadohk oh dipwsouhn doadohk kan me doke pali wet pahn kepideklahng sahpis kapw wet.

Kempahn Roson Mwahu kamwakamwahuiala ah tungoal data base kan pwehn wia mehn doadoahk ohng weipokon, ahpw mehlel Dr. kan oh irail kan me katakatang koperment pwe ren kin kak koasoanehdi dahme pahn koaieu mwahu ohng roson en mehn Pohnpei.

Kempa wet tungoaleneki kahpwal en alehda tohn doadoahk sang ni irail tohn sukuhl kan en rahn pwukat arail sohte pereniki sukuhlki pali wet. Mie mwelek me pwehki arail kin apwalki wahntue oh science.

Ire Keweneuh.

Sang Kempahn Apwalih Meleilei oh Onepek en Weipokon:

Kaun en Kempa wet kapehse me Workshop ehu pahn wiawi ong irail palien Police nan sounpwong en August 2012.

Epwel pen driver kan me kin pato pahn litopw en sakau en waih oh me pwulopwul pahnengin souhnpar pahn kakehlaila. Mehlel ni imwin wihk kan.

Eh sansalada nan cabinet mihting wet me mie anahn laud doupen ohpis kan en kin wiawi, ahpw mehlel nihpwong kan.

Director Carlos kasalehda me program en tehk weren nansapw de sidohsa kan pahn wiawi ni ahnsou keren.  Petehk wet pahn tepikihda sdohsa en koperment kan oh mwuri, ahpw pahn doulahng mehteikan de private vehicle kan.  Met pwehn kadiarakada ma weren nansapw pwoato konehngete en wie doadoahk pohn elen weipokon de soh.

Pisetik en ire pwukat kak en alahldi sang Kempa en Apwalih Onepek oh Meleileihn Weipokon.

Ire Keisuh.

Sang Ohpis en Fisheries and Aquaculture OFA ( Paih en Paliesed):

Nan sounpwong en August 2012 mie workshop ehu me pahn pida wiepen apwalihada “Seaweed” de soangen oaloahd akan me kak wia mehn karoson.

Kepina Ehsa kupwurki project en deke Lenger en kapwurpwurieng.

Ire Kewaluh.

Sang ni Ohpis en Usuhs (Election Office):

Nin duwen Election Commissioner Johnny ah kasalehda, koasoanepen kamwahulahn pwukoah kan en pali wet wiewiawi. Met me kahrehda workshop ehu pahn wiawi nan wehin Australia ni July 26, 2012 oh Mrs. Donre AO en Election Commission me pahn iang towehda.  Workshop wet wia sawas ehu sang wehin Australia oh isaihs kan koaros me anahn Ohpis en Usuhs en Austdralia me pahn pwukohki.irail me pwukoahki.

Kepina Ehsa kasalehieng cabinet kan me anahn ohng ni wekid kosonned en usuhs laud mehle, kaweihd sang emen emen anahn.

Ire Keduwauhh.

Sang Ohpis en Pohnpei Transportation Authority (PTA):

PTA Commissioner, Mr. Sadorino Martin (Dauhk Kitti) kasalehda me eh diarada me pali laud en doadoahk kan wiawier oh imwiseklahr.  Doadoahk en wia ahl me PTA tapiadahr oh pahn kanekehla nihmwin pahret, we mihmi ni $300,000.00.  Kahpwal me mie iei dipwisou en doadoahk kan inenen meringlahr oh pali laud solahr kak doadoahk mwahu.

Mr. Martin kasalehda me eh pahn wia wen ah kak koaros pwehn wiahda mwohni me pahn kak apwalih salary en nah tohn doadohk kan oh tapiada kapwung en PTA pweipwand wereilahr kan.

Ire Ke-eisek oh me wia Keimwseklahn Ire:

                                                                                                                                                                          Ohpis en Public Affairs.                                                                                                                      

Mr. Heinrick Stevenson, Public Affairs Officer kapehse Mr. Antonio Martin me alahldahr oh wialahr Local Governments Liaison Officer. Mr. Stevenson pil kasalehda me Mr. Martin pwukohki Mwoalen Wahu, Koperment en nan Wehi kan, Fieled Trip oh kapwil Pohnpeimet Radio Program.

Mr. Stevenson luke ehu ehu department oh ohpis ren iang audehda “Pohnpei Met Radio Program. Ohpis wet poaki ni karakarahk rehn emen emen cabinet oh opiser kan ren kin kalelehdohng Pohnpei Met Radio Program dahme re kehn oh kamehlele me ahr ohpis kan anahne kapehse ohng weipokon. Weipokon sapwenlimaniki manaman en wewehki dahme emen emen cabinet wiewia nan ah ohpis pwehki iei tohn wehi me karehda emen emen cabinet kan ah wie doadohk.

Eri, maingko, iei ire tohror wet me kairalahr audepen sapwellimatail “Pohnpei Met Radio Program #7-02. Kumwail ketin iang kit nan Pohnpei Met Radio Program No. 7-3, me pahn wiawi mwurin met.  Kaselehlie.  





Contact us for more info


image


image

imageWelcome to the Governor of Pohnpei Website........>Kaselehlie......>Pohnpei Met!
image