Image
image
image
image


Pohnpei Met Radio Program
 


PohnpeiMet Radio Program 8-5

Iei eden program en kapehse kesempwal wet Pohnpei Met Website Program me kin kaonopada sang ni Ohpis en Kepina pwehn kin kalekalelehki tohn Pohnpei unsek ki ire kesempwal akan me kin pwarapwarada nan Government en Pohnpei.

 

Ire pah kan iei me pwarada nan irair en wihk ehu me patolahr nan sapwellimatail Government en Wehin Pohnpei.

 

Ire Keieu:  Keriau en Kepina, Marcelo K. Peterson patohwan iangehr towehda wielamalam en irail Local Chief Executives kan ni ar tuhong Congressman, David Panuelo. 

 

Nimenseng en Nialem, August 3, 2012 kuloak 10:00 Keriau en Kepina, Marcelo K. Peterson patohwan iangehr towehda wielamalam en irail Local Chief Executives kan en Wehin Pohnpei me patohwan wiawier nan sapwellimen Wehin Pingelap ohpis en wehi me pato Nan Pepper, Lopidi #7 en Kolonia Town.  Kahrepen wielamalam en Local Chief Executives wet  pwe irail en katih oh paiaudaudki pene ire kesempwal ekei me sang irail Pohnpei Delegation ong nan FSM National Congress oh irail en pil katih oh paiaudaudki pene ire kesempwal ekei sang Government en Wehin Pohnpei.  Weliepen Delegation en Pohnpei nan FSM Congress me patohwan iang towehda wielamalam wet iei, Congressman, David Panuelo.

 

Ni koaros ar soandier, Vice-Chairman, Keropin David ahpw kamwakidewehr wielamalam wet ni ah koasoamwohier koaros oh kapingki mehlel duwen koaros ar kak kapwaiada audepen luhk ong ni

wielamalam wet, ahpw mehlel Congressman, David Panuelo oh Lt. Governor, Marcelo K. Peterson.  E ahpw doula oh kapwukoahkier Mayor, Makir Keller, Pingelap Municipal Government en patohwan wia kapehsepen irail tohn Council wet me iang towehda wielamalam wet, e ahpw doulahr ninduwe met:  1) Luhkenmoanlap, Keropin David, Kitti Municipal Government, 2) Mayor, Casiano Shoniber, Kolonia Town Government, 3) Mayor, Makir Keller, Pingelap Municipal Government, 4) Mayor, Ermick Rudolph, Nukuoro Municipal Government, 5) Luhkenkolwof Rep., Kenio Frank, Sapwuahfik Municipal Government, 6) High Commissioner Rep., Denson David, Madolenihmw Municipal Government, 7) Chief Rep., Johnson Sepeti, Mwoakilloa Municipal Government,  8) District Administrator Rep., Mwahnakapw en Wehin Nett men me ah tungoal ahd sohte dehde ong Pohnpei Met radio program.

 Pil mie irail teikan me iang towehda pwe ren iang patohwan audepen wielamalam wet.  Ni imwin kapehse wet Mayor, Keller ahpw doulahr oh weliandi koaros oh wia sakaradahn kaping oh peki sawas en Ngehn Sarawi ong nan wielamalam wet.

 

Nan keirekidi en ire kan nan agenda (de audepen wielamalam) en rahn, nempe 3 e pidada emen emen tohn Council wet ar pahn patohwan reportki soangosoangen projects (de doahklap) akan me wie mwekimwekid nan

ehu ehu wehi kan oh ia iren doadoahk pwukat ma re imwiseklahr de iaduwe.

 

Mayor, Casiano Shoniber me tapiada report oaralap pwukat ni ah kasalehda duwen ah tungoal kaping laud ki epwelpen project en kamwahulahn nan puwelenial ehu me kainene 4-TY Store nan Kolonia. Tehtehn sawas (de mwohni) wet patohda sang Congress en FSM oh kisehn doadoahk en project wet te pil pahn song en tapiada Street Light nan puwelenial akan me anahn laud mie, me rasohngete 4-TY.  Tepidahn doadoahklap wet pahn pahsan soandi en company laud ehu me pahn patohwan wia doadoahk wet, me adaneki, “Green Energy.”

 

Luhkenmoanlap, Keropin David pil patohwan sakarkihda me nan Wehin Kitti planepen doadoahk me wiewiawi oh ele nan ehu wielamalam en mwuhr a report dehde ehu ahpw pahn kak en sansal.

 

 

Mayor, Makir Keller patohwan sakarkihda duwen ah kapingki mehlel sawas me mie sang FSM Congress me kahrehiong kamwahula en mehn kapehse nan Wehin Pingelap pwehki ar kakehr iang doadoahngki satellite ong ni email oh pekederpen me kepilsalehd de soumwahu sang Pingelap ong Pohnpei.  E pil doula oh kasalehda nanpwungen me kepilsalehd ehk

limmen (15) meh riemen (2) me pekederehr pwehki ar anahn karuwaru de emergency.  Pil kisehn kamwahula wet te pil kahrehiong ekei irail tohn sukuhl iangahki ekei tohn doadoahk kan ar pil kakehr online.

 

Mayor, Keller doula oh kasalehda duwen anahnepen $4,000.00 ong Wehin Pingelap pwehn kamwahuihala oh kadokelahng lioal me doadoahngki kehl en ketipin de solar system ong ni tehnpas de ihmw akan oh Pingelap pil wie pekipeki sawas en PUC ong ni koadoahkepen anahn wet.  Pil ehu e pil doula oh kasalehda duwen anahn en program en me pwulopwul kan $500.00 pwe irail en kin kak doadoahngki ong ni katakataman doadoahk kan me udahn wia pein sapwellimen Wehin Pingelap (de Pingelapese Culture).  E patohwan doula oh kasalehda me e pil men peki rehn FSM Congress sawas en mwohni ehu ong ni kaweidpen de kamwahulahn “Strategic Plan Development” ong Wehin Pingelap.  E patohwan kaimwisakala oh kasalehda me soahng teikan wie popousla te ninduwen me kin wiewiawi.

 

Luhkenkolwof Rep., Kenio Frank mwowe, patohwan kapehse mahs Mr. Robert Inek ninduwen ah patohwan wia radio operator en Wehin Sapwuahfik oh kaimwisengkihla me Wehin Sapwuahfik wie pekipeki $10,000.00 sang FSM Congress ong ni onohndahn Ohpis en Wehin Sapwuahfik oh pil iangahki pouslahn de kalaudlahn ohpis wo.

 

Chief Rep., Johnson Sepeti patohwan kasalehda ni oaralap anahnepen wen mwohni kei ninduwe met:  $10,000.00 ong ni onohndahn ohpis en Wehin

Mwoakilloa, pil $20,000.00 ong ni mehkot me sohte dehde ong Pohnpei

Met radio program.  Oh $5,000.00 ong ni koadoahkepen kamwahula en internet pwehn pil duwehte Wehin Pingelap.

 

Mayor, Ermick Rudolph patohwan kasalehda ni oaralap me sohte project me Wehin Nukuoro patohwan wiewia rahn pwukat.  Soangosoangen kahpwal tohto mie, me rasohng anahnepen $10,000.00 ong ni kamwahula en Lehpwel (Taro Patch).  Pil anahnepen wen mwohni ehu ong ni kokoudahn Trust Fund ehu.  Anahnepen pelien sahpw ehu ong ni kalaudepen wasa me Nukuoro kin wie doadoahngki rahnpwukat pwehki ah solahr itar.  Anahnepen onohndahn ohpis en Wehin Nukuro pohn dekeo.  Anahnepen kapar pwihk pohn deke Nukuoro.  Pil mie pekipek en kokoudahn wasahn alehda mwahmw, ahpw saikinte pasapengla.

 

Weliepen District Administrator kasalehda duwen kaping laud Nett District Government tungoaleneki ong ni wen $50,000.00 ehu me patohda sang FSM Congress ong ni koadoahkepen Nett District Park oh $10,000.00 ong ni alahladahn sidohsa ong Nett District Government.

 

Keriau en Keping, Marcelo K. Peterson patohwan kasalehda te ni oaralap duwen ohpis en Kepina ah patohwan kapingki mehlel duwen Program en Kamwakelehda Pohnpei me tepikidahr program en riktehnpwoaht me tepidahr oh pil uhdier ahnsou ehu me patolahr ki anahnepen kalaudlahn mwohni wo en pil wiawi.  E doula oh kasalehda me kalaudla wet pweidahr sang ni ehu pene en ohpis en Kepina oh Pohnpei Legislature Kewelipak ara sawaskipenehr oh patohwanda pil ehu $50,000.00 pwehn uhsehla doadoahk wo.  E uhsehla oh kasalehda me ele kolahng ni imwin sounpwong en August 2012 wet pouslahn doadoahk wet kakehr pil pousla.  E pil wia pekipek ehu ong Local Governments kan ren pil iang tapiada program en kamwakel wet pohn deke kan.  E kaimwisekala oh pil kasalehda me e kamehlele me mwekid wet wia ehu kisehn de kasalepen Keirdahn Wasahn Kousoan akan, ahpw mehlel Keirdahn Paii en Wehi ong kitail mehn Pohnpei.  Met pwehki ni mwakelekel en wasahn kousoan ehu ah pahn mie, a tohn seiloak kan pahn pereniki mwemweitih ninlimatail wet Pohnpei.  Pil ni ahnsouo te mwohni pahn kak mwerediong aramas en Wehin Pohnpei.

 

Pil kisehn te ire wet Pohnpei pil kaokaonop pwehn tapiada kadar wahnsahpw me rasohng uht ong wehin Guam.  Eri, a pwe doadoahk wet en kak pweida, rompen kak en Wehin Pohnpei ong ni ire wet en keneinei pwehki kitail de pahn oh sohla kakohng anahn akan me pahn leledohng

kitail.  E sansalohngehr Weipokon en Pohnpei duwen ehu kemwekid me pil tepidahr, iei project en alahldahn oh pekederpen “Matop” de Sea Cucumber.  Eri, doadoahk wet tepikidahr kasukuhlpen poadok “Matop” pwe e dehr lel ahnsou en anahnepe a e sohla itar oh en dehr pil mwomwila sang rehtail.

 

E kaimwisakala oh kasalehda ni oaralap duwen kahpwal laud me kitail ketin sohsohpaih rahn pwukat.  Kitail koaros ketin mwahngih me sounpar 10 samwa luhluhweikitail mwohn imwilahn Inou en Minimin Saledek Keriau ah pahn imwisekla oh sapwellimatail Trust Fund me mie rahn pwukat sohte pahn kak dapwinda sapwellimatail anahn akan.  Iei kahrepen program en World Park ah mie, me kesikipe mie me ele November 2012 a e pahn imwiseklahr koadoahkepe kan.  Oh pil iei kahrepen Program en Kamwakelhda Pohnpei de program en riktehnpwoat me eledahr patodahn $50,000.00 en mwowe oh pil ehu $50,000.00 me pil apwtehn kamanamanla, ele kakete en kemwekid nan lukepen sounpwong en August wet de kolahng ni imwi.  Rahn wet se pil ehukiongehr palien shipping company ehu ong ni kapweitikitiklahn isepen pekeder tehnpwoat ong liki en pil mie oh e pil pweidahr.  Iei ire pwukat me kairalahr en Keriau en Kepina, Marcelo K. Peterson ah tungoal sakarada de kaweid.

 

Mayor, Casiano Shoniber pil kasalehda ni oaralap ehu kahrepen

wielamalam en rahn wet ah wiawi, pwehki program kapw ehu me ih oh Congressman, David Panuelo tuhkipenehr duwen anahnepen program wet me adaneki, “Technical & Vocational Educational Training” de TVET en kokouda nan Pohnpei.  Met pwehn apwalih soangen mehn FSM kan me kin men patohla nan wehin liki kan pwe irail en repen doadoahk, ahpw

sohte nohn ahneki maraineki seiloak de koahiengki soangen doadoahk kan.

 

Met me kahrehda Congressman, Panuelo ah tapiekidahr report oaralap ehu me pida irail Delegation en Pohnpei nan FSM Congress arail pwarekehr wehi kei nan Wehin America, iangahki Wehin Hawaii oh Territory en Guam ahnsoukis me patolahr pwe irail en pil iang patohwan iren irail mehn Pohnpei de pil FSM kei me iang patopato nan Wehin America pwehki doadoahk oh pil sukusukuhl.

 

E patohwan doula oh kasalehda me e pil iang pehm me udahn anahnepen program en TVET en kokouda.  Ahpw pwehn kokouda, anahnepen program en ropirop ehu en wiawi ong mehn Pohnpei de FSM depe me patopato nan wehi laud kan likin Pohnpei de FSM.  Eri, ropirop (de sensus) wet pahn anahne $200,000.00 ehu pwehn kak kapwaiada wiepen ropirop wet.  E doula oh pil kasalehda duwen irail Delegation en Pohnpei ah pil

sohsopaih anahn laud kei me mie nan Pohnpei me rasohng Lopidi Laud #3 anahne isais ong drivers en School Bus silimen ma government en Pohnpei kak en apwalih.  Projects en ahl akan pil mie.  Project en kamwahula en

wasahn kamwadong kan pil mie me wen tehte me pahn apwalih patopato

 ni wen $300,000.00.  Met pahn anahnepen tehte kapatapat ehu en patohda sang Government en Pohnpei.  Program en me pwulopwul pil mie.

Program en lih pil mie, me ehu karasepe, mwekid en lih ehu apwtehn pwurodo sang Wehin Chuuk pwehki ehu wielamalamlap en irail lih akan en FSM arail patopene nan Wehin Chuuk.  $90,000.00 ehu patohda ong Nett District Government ong ni onohndahn ahl.  Met pil pahn anahnepen tehte kapatapat ehu en patohda sang Nett District Government (de Matching Fund) pwehn itar ong anahn wo.  Pil anahnepen $11 million ehu ong ni kamwahulahn ahl akan en Wehin Pohnpei.  

   

Me kaimwisakalahr wielamalam wet iei patodahn Kamwomwadahn Pekipek ehu ong ni kokoudahn FSM TVET.  Local Governments kan pahn patkihong Pohnpei State Government oh patkihong Pohnpei Delegation nan FSM Congress ki Kamwomwadahn Pekipek wet.

 

 

 

Ire Keriau:  Keriau en Kepina, Marcelo K. Peterson patohwan tuhongehr irail soumwet en Pohnpei kei oh semen en pekederpen wahnsahpw akan ong wehin liki kan nan Conference Room laud nan ohpis en Kepina.

 

Niare, August 7, 2012 kuloak 10:00 nimenseng Keriau en Kepina, Marcelo

K. Peterson patohwan tuhongehr soumwet en Pohnpei kei iangahki semen en kadar wahnsahpw ekei ong wehin liki kan pwehn pil tuhkiongirail koasoandi  en Wehin Pohnpei wet rahn pwukat.  Nan program mwotomwot ehu me kaonopada oh  Administrator, Kadalino Lorens, Office of Economic Affairs (OEA) me patohwan wia Chairperson nan wielamalam wet.

1.       Sakaradahn Peki Sawas en Ngehn Sarawi wiawisangehr Reverend.

2.       Sakaradahn koasoamw ehu oh kawehwe oaralap en kahrepen tuh-

          pene wet pil wiawier sang Keriau en Kepina, Marcelo K. Peterson

          ninduwe met:

-         Koasoansapahlepen pekederpen wahnsahpw ong wehin Guam

oh wasa teikan ninduwen ineng en Pohnpei State Government rahn pwukat.

-         Mie weliepen Pohnpei State iangahki mehn Pohnpei pilipilda kei me kin patopato nan wehin Guam me iang ih wiewia petehk keneinei ong ni ire wet.

 

 

-         Ohpis en Keriau en Kepina patohkiongehr company en sohp ehu “Madson” ma e kak en koasoanehdi koasoandi en pweipwei de isais itar ehu me pahn poatoapoat ong ni wiepen pekederpen wahnsahpw akan ong Guam oh kapwurupwurodohn container tehnda kan.

-         Pohnpei State Government pil wie patopatohieng Pacific Development Bank me pato Guam ma e kak en sewese businesses kan me kin patohwan anahne sawas en tehte de mwohni pwehn tapiada oh kamwakamwakid netinetlahn wahnsahpw akan en market nan Guam.

-         Pohnpei State Government pil patohkiongehr Michigan State University en patohwan iang sawas ong ni anahnepen sawas akan me pida semen akan ong ni pekederpen wahnsahpw akan en Pohnpei.

E patohwan kaimwisekala ah tungoal sakarada oh kasalehda me kesikipen

kahrepen weilamalam wet en pweida, pwe paiaudaud pene ki ire kesempwal akan en pwarada, koahiek kan me mie rehn emen emen en pil pwarada oh tapiada plan ehu ong ni kahkewei en mwekidwei kan en ahnsou kan me pahn patohdo.

             

3.       Kasalada oaralap pil wiawier sang Luhk, Perdus Ehsa duwen ah tapiada doadoahk wet, “Netin Uht” ong Guam.  E doula oh

 

kasalehda me pekederpen uht sang Pohnpei ong Guam wia business mwahu ehu oh e kak wia sawas laud ong soumwet kan oh markets kan kak ren pil wiahda mwohni.  Pouslahn doadoahk wet kak wiewiawi ma sohte soangen karampw oaralap 2 pwukat me pahn patohwan sansalada pah:

-         Wasa pohn mehn peidaid akan sohp de sompihr anahne en epwella oh soandi mwahu mwohn mwekid en pekeder ah pahn pwurehng wiawi.

-         Pali kan en government me kin iang pwukoahki petehkpen dipwisou kan me kin pekederla liki sohte koasoandiongete wasahtehkis pwehn mengei ong soumwet akan.

 

Ni oaralap, Keriau en Kepina, Marcelo K. Peterson patohwan pwurehngete kadehdehda me sang ni wahn wielamalam en rahn wet e pahn wia dipwisou en doadoahk ong Pohnpei State Government pwehn diarada ire kesempwal akan ong nan mwekimwekidwei en ire kan me pidada pekederpen wahnsahpw en Pohnepi ong likin Pohnpei.  Ire pwukat iei ire oaralap ekei me sansalehr rahn wet.

-         Petehk keneineipen duwen market anahne en kemwekidwei ni keneinei oh pwung pwehn kadehdehda ni mwahu oh mehlel duwen koasoandi pwung en market.

 

 

-         Epwelpen keseu de petehk kan me kin wiewiawi anahne en keneinei oh kamwahula pwehn kapwaiada anahn akan en me kin anahne sawas pwukat.

-         Kaiahn de kasukuhl ong soumwet kan anahne en wiawi pwehn kamwahuihla ar wahnsahpw pwe ar wahnsahpw akan ren kak iang lelohng duwen anahn akan oh soumwet akan ren kak iang patohwan duwen anahnepen markets kan ah kin wie lalaudla.

-         Pali kan koaros me kin wia sahpis ren minimin pene ni ar pahn koadoahke oh kapwaiada sahpis kan me irail tungoaleneki   

         

4.       Patopato pene wiewiawier nanpwungen pali kan pwehn song en

          apwalihada kahpwal akan me patohwan sansalehr.

5.       Keimwiseklahn patopato pene kan wiawier oh kaimwisangkalahr

          kaping mwuledek sang Keriau en Kepina, Marcelo K. Peterson oh

          Administrator, Kadalino Lorens, Office of Economic Affairs (OEA).

 

Ire Kesiluh:  Kepina, John Ehsa patohwan koasoamwohier soumwet ekei

sang Wehin Nett nan ah tungoal ohpis pwehki arail men kasalehiong ih

wahn arail tungoal doadoahk en utuht ong ni wiawidahn kisin koanoat

de kisin sak kan me pein sapwellimatail.

 

Nimenseng en Niare, August 14, 2012 ele kuloak 9:00 soumwet ekei sang

Kousapw Kahmar nan Wehin Nett patohwan lelehr nan ohpis en Kepina ni

arail patohwan soangosoangen kaonopadahn kisin koanoat, sak, tungoal

akan me pein sapwellimatail me pein irail patohwan kaonopadahr pwe

irail en patohwan tuhkiong Kepina, John Ehsa.  Ni arail lel nan ohpis en

Kepina oh perekiwehr soangosoangen kisin koanoat, sak, tungoal pwukat

pohn tehpel nan en Kepina, Ehsa ah tungoal wasahn wielamalam pwe

Kepina en kak kasawih wiepe kapwuriamwei pwukat.  Kepina, John Ehsa

ahpw kapwukoahkier Pohnpei Met radio program en patohla pwehn iang

udiahl oh kadehde duwen pweidahn doadoahk wet oh patohwanlong nan

Pohnpei Met radio program pwehn sansal ong Wehipokon en Pohnpei.

 

Kepina, John Ehsa ahpw wiaier ah tungoal kaping laud ki doadoahk ka-

pwuriamwei pwukat me pein ih kin patohwan medemedewe oh kamehlele

me mehn Pohnpei kak en iang wiahda soahng kei me pali laud en kitail

mehn Pohnpei kin ketin oh patohwan pwapwain nan sidohwa kan.  E

patohwan doula oh kasalehda ni oaralap me audepen pein ah tungoal

euremen oh madamadau kan wie sansaladahr.  Kepina pil doula oh

kangoange soumwet pwuko ren nantihla mwowe nan doadoahk wet oh

kaparahiong mehn Pohnpei pwe doadoahk en enginkehlap en kak wiawi

ong ni doadoahk mwahu oh kapwuriamwei wet.  Oh pwehn pil tapiada

ekis irehdi kapidolongodo en soahng kan me pein sapwellimatail seri kan

kin soakoanehkin kitail sahm oh ihn akan nan sidohwa kan pwehn

kapweipwei ong irail.  Nan soahng kan me soumwet pwuko patohwan

perekilahr pohn tehpel iei:  Keieu, soangosoangen Kim-Chee 3 me

wiawihkihda pwurien kahlepen kotop, Keriau, pwoatoal en juice 3 me

wiawihkihda weipwul, Kesiluh, ehd en chips en mahi 3, Kapahieu, ehd

en chips en sawahn Hawaii 3, Kelimau ehd en idihd en kehp 2, Keweneu,

ehd en idihd en tapioca 3, Keisuh, ehd en sakau en Pohnpei peleng 2, Kewaluh ehd en idihd en mwahng 2, Keduwau, ehd en idihd en kehpineir 2, oh Keisek, ehd en tea me wiawi sang ni wah oh tehn weipwul 2.

 

Soumwet pwuko patohwan ong Kepina, John Ehsa me soahng pwuko

koaros pahn wia mehn kisakis ong ih, ahpw pwehki peren laud me Kepina,

John Ehsa tungoaleneki, e pein patohwan ong soumwet pwuko me soh, e

udahn pahn pwainsang koaros pwehki e udahn anahne iang kapehse ki

ong mehn Pohnpei duwen doadoahk koahiek oh kesempwal wo.  

 

Eri, maingko, iei ire pwukat me kairalahr audepen sapwellimatail “Pohnpei Met Website Program” nempe 8-05 wet.  Ma mie kupwuromwi iren keinemwe de kalelapak oh ong ni kaweidpen kamwahula en program wet, a komw kalahngan oh malipe telephone #320-2570 email ong Website wet. Kalahngan en kupwur koaros, oh Kaselehlie Maingko.

 

 





Contact us for more info


image


image

imageWelcome to the Governor of Pohnpei Website........>Kaselehlie......>Pohnpei Met!
image