Image
image
image
image


Pohnpei Met Radio Program
 


Pohnpeimet Radio Program No.8-06

 

Iei eden program en kapehse kesempwal wet “Pohnpei Met Website Program” me kin kaonopada sang ni Ohpis en Kepina pwehn kin kalekalelehki tohn Pohnpei unsek ki ire kesempwal akan me kin pwarapwarada nan Government en Pohnpei.

 

Ire pah kan iei me pwarada nan irair en wihk ehu me patolahr nan sapwwellimatail Government en Pohnpei.

 

Ire Keieu:  Kisinlikou ehu me pekedersang rehn Acting Administrator, Itaia Fred, Office of Fisheries and Aquaculture (OFA) ong Pohnpei Met Radio Program.

 

Mwohn ahi pahn patohieng nan ire wet I men patohwan wia ahi tungoal sakar mesik ki pwandala en patodahn ire wet ninleng pwehn sansal ong weipokon, ahpw mehlel ahi tungoal pekimahk ong Acting Administrator, Fred oh ohpis wo.  Met sang ni salongala en kisinlikou kiset nan irair en ahnsoukis me patolahr oh pwurehngehr dierekda. 

 

Mwurin souwas en August 3, 2012 Mr. Itaia Fred, Acting Administrator, OFA patohwan kadarohngehr Pohnpei Met Radio Program kisinlikou ehume pekipeki rehn Pohnpei Met radio program en Kalahngan oh kapatahiong nan ah tungoal program akan ire wet.  Met pwehn kairehki weipokon en Pohnpei, ahpw mehlel ong irail soused oh tohn seiloak kan nanpwungen Wehin Pohnpei ong Deke Pakin.  OFA men patohnwan kairehki weipokon me mie dipwisou en doadoahk ehu, me mehn Waii kan kin kahdaneki, (Payao) me ohpis wet patohwandiong likin Deke Pakin

pwehn kakereniedohng mwahmw akan ong Deke Pakin mwahmw akan me patohwan dohsangehr deke wet.  Met pwehn mwahu ong soused akan me kin wie lalaid likin Deke Pakin de pil nan nahmw en Deke Pakin.

Dipwisou kesempwal wet pil pahn mwahuong soused akan me kakete salongasang sahpw oh kakete ihda ni dipwisou kesempwal wet oh poudekidiong ie oh pahsan epwelparail nan ahnsou kan.  Kupwuren minimin ong ni iren kair kesempwal wet pahn inenen sewesehda mehlel sapwellimatail doadoahk en weipokon en Pohnpei.

 

Ire Keriau:  Pohnpei Met radio program patohwan tuhong Administrator, Fredrico Primo, Office of Transportation and Infrastructure.

 

Mwurin souwas en Nialem, August 17, 2012 kuloak 3:15 daulih, Pohnpei Met radio program patohwan tuhongehr Administrator, Primo pwehn alehdi iren pweida kan me mie nan ohpis wo.  Nan tuhpene mwotomwot me wiawier, ni oaralap pid pali kan me mie nan ah tungoal ohpis wet.  Ni oaralap, nan ohpis wet, nan Administration wet pali weneu mie.  1) Palien Construction me kin apwalih project lap akan me pidada ihmw, (Mr. Ricky Lebehn) me kin patohwan apwalih.  2) Palien Civil Engineering oh Architecture iei palieu  me kin apwalih petehkpen wen kehlail en project

de doaklap ehu, me rasohng ma wia ihmw, a ia wen kehl en poahsoan en ihmw wo de wiawidahn ihmw wo.  Ma ahl, a ia wen kehl en poahsoan en ahl wo oh koadoahkepe kan ma e kehlail de soh.  Pil nan pali wet te, iei pali en Architecture de pali ehu me kin pwukoahki mahlenihada plan en projects kan.  Me pahn rasohng, ma ihmw, a pali wet me kin wiahda plan ni mahlen, ni pato en Engilish “Blue Print.”  Ma ahl, a e pil pahn mahlenihada wasa kan me ahl akan pahn tangatang ie.  Me patohwan wia Engineer iei Ms. Nanita Roldan Miralles oh me patohwan wia Architect iei Mr. Ryan S. Roque   3) Palien Municipal Liaison iei pali ehu me kin patohwan wia pwukoahn kadokepen ohpis en T&I oh ehu ehu wehi kan ong ni anahn akan me T&I patohwan pwukoahki ong weipokon en Pohnpei.  Me patohwan pwukoahki Municipal Liaison iei Mr. Peter Aron, me pil patohwan kepinkoanoatki Nahnpein U sang Mwohnsapw Sahngoro.  4) Palien Sanitation de me pidada mwakelekel.  Iei pali wet me kin ehukiong palien Environment Protection (EPA) duwen doahklap akan pwehn dehr kapwarehda kasamin nan wasahn kousoan akan.  Me patohwan pwukoahki pali wet iei       Mr. Nelson Henry.  5) Palien Administration and Accounting iei pali ehu me kin pwukoahki oh apwalih doadoahk en nan ohpis en T&I oh mwekimwekid en pwuhk en mwohni en projects de doahklap akan me ohpis wet kin patohwan pwukoahki ong weipokon en Pohnpei.  Me patohwan pwukoahki pali wet iei Mr. Kortis

Peter.  6) Palien Shipping de pali me pidada mehn dakadak kan oh pil lel  sohp ape.  Ohpis wet pil kin patohwan patkihong Pohnpei Transportation Augthority (PTA) soangen projects kan me pidada wia ahl akan.  E sansal-

amwahu ong Wehin Pohnpei me onohndahn ahl ekei wiawier oh imwiseklahr ninduwen me Pohnpei Met radio program patohwan sakarkidahr nan program en mwowe ko. 

 

Tehnwaratail sohp pwoat mie, iei MS Micro Glory me ahnsou reirei solahr doadoahk sang ni ah pil luwetalahr mehlel.  E udahn wia ehu anahn laud ong Government en Pohnpei en ropada weliepen tehnwaratail sohp pwoatet ni ahnsou mwadang pwehn uhsehla ah tungoal sahpis ong weipokon.  Ohpis wet pil kin patkihong ohpis en Public Affairs ong ni epwelpen sohp pwoatet.  Me kin patohwan pwukoahk pali wet iei Mr. Princeton Johnny.

 

Ire Kesiluh:  Ohpis en Transportation and Infrastructure T&I patohwan kehsehki Pohnpei Met radio program en patohwan ong nan ehu radio program duwen koasoandi en kasarawipen Imwen Sukuhl kapw siluh kan me koadoahkepahr imwiseklahr.

 

Mwurin souwas en Nialem, August 17, 2012 Administrator, Fredrico Primo

 

patohwan katamaneki Pohnpei Met radio program en kataman nan

program en met pwehn kasalehda duwen imwiseklahn koadoahkepen imwen sukuhl 3 me patohwan imwiseklahr oh duwen koasoandi en kasarawiparail kan me koasoandier.  Imwen sukuhl 3  kapw pwukat iei, 1 Sapwalap Elementary School, nan Wehin Madolenihmw.  1 iei Saladak Elementary School, nan Wehin U.  Oh 1 iei Nett Elementary School, nan Wehin Nett.

 

Koasoandi en kasarawi pwukat soandier ninduwe met:  1) Sapwualap Elementary School pahn patohwan tapiada oh koasoandiong Niesil,  August 29, 2012 kuloak 10:00 nimenseng.  2) Saladak Elementary School pahn patohwan wiawi Nialem, August 31, 2012 kuloak 10:00 nimenseng.  3) Nett Elementary School pahn patohwan wiawi Nialem, September 7, 2012.  Doaropwehn luhk oh program en ehu ehu rahn akan wiewiawi oh pahn pekederpeseng ahnsou keren.

 

Niehd, August 20, 2012 doaropwehn luhk kan lelohngehr ni ohpis en Local Governments Liaison Officer pwehn pwukoahki ong ehu ehu wehi siluh kan me kasarawi pwukat pahn wiawi ie pwe irail en ahng oh uhse luhk pwukat ong lapalap en ohpis en wehi pwuko, soumas/peliendal oh arail tungoal werek kan.  Nan doaropwehn luhk pwukat e pil sansalehr duwen keirekidi en program en ehu ehu kasarawi pwukat.  Luhk wiawi ong tohn Wehin Pohnpei unsek, ahpw mehlel tohn wehi kan me kasarawi pwukat

pahn patohwan wiawi ie pwe kitail en ketin wauneki oh kapingki duwen kalahngan ekei sang Wehin America pahn Inou en Minimin Saledek Keriau ong Wehin FSM.  Sawas pwukat patohwan paiahngedo sang FSM National Government ong sapwellimatail Government en Wehin Pohnpei pwehki anahn en sapwellimatail seri kan en dih wet oh dih kan me pahn patohdo.  Iei te soangen kasarawi pwukat me kitail ketin ketidosangehr loale me

wiawi ong wehi de pil wasa 3 me iei, Pohnlangas High School nan Wehin Madolenihmw, Nahnpei Memorial High School nan Wehin Kitti, oh Kolonia Elementary School nan Kolonia Town.  Ehu soangen projects pwukat kin patopato ni wen $1m +.  Soangen projects de doahklap pwukat inenen wia katep oh keirda mwahu ong sapwellimatail seri kan en rahn pwukat oh ahnsou kan me pahn patohdo.

 

Ire Kapahieu:  Posongisong wiewiawi ong tehnwaratail sohp MS Micro Glory.

 

Mwurin souwas en Niare, August 21, 2012 Pohnpei Met radio program patohwan alehdi rohng pwoat sang ni ohpis en T&I me posongisong wiewiawi ong tehnwaratail sohp MS Micro Glory pwehn diarada wen kak en ah pahn patohwan tapiada sahpis ong dekehn Pohnpei kan oh pahpahsando soandi en plan oh pekipek kan ong ni oapwoat tehnwaratail sohp kapw.  Posongisong wet wiawier sang nimenseng en rahn me

sansalehr ong Deke Pakin oh pahn pwurodohng Pohnpei.  Nan program

en mwurin met kitail kak en mwahngih oh patohwan pene pweidahn posongisong me wiawi ong MS Micro Glory.

 

Eri, maingko, iei ire pwukat me kairalahr audepen sapwellimatail “Pohnpei Met Website Program” #8-06 wet.  Ma mie kupwuromwi iren keinemwe de kalelapak oh ong ni kaweidpen kamwahula en program wet, a komw kalahngan oh malipe telephone #320-2570 de email ong Pohnpei Met Website Program.” Kalahngan en kupwur koaros, oh Kaselehlie Maingko.

 





Contact us for more info


image


image

imageWelcome to the Governor of Pohnpei Website........>Kaselehlie......>Pohnpei Met!
image